منقوش

اتنی زیادہ تعداد میں چوریاں، آخر وجہ کیا ہے؟؟؟

2012-01-20T10:15:00.001-08:00

پاکستان اور خصوصاً کراچی جیسے بڑے شہر میں بڑھتی ہوئی چوریاں اور ڈاکے اور چھینا جھپٹی کی تعداد میں روزافزوں اضافہ کے ساتھ ساتھ دن میں کئی دفعہ مختلف جگہوں پر چوری ہونا ایک معمول بن گیا ہے۔ دن میں بینک، زیورات، موبائل اور ڈھیروں گاڑیاں چھینی جا رہی ہیں ایسا ہی سانحہ کل ہمارے ایک دوست کے ساتھ بھی ہوا کہ اُنہوں نے صبح میں موٹرسائیکل ہانڈا 125 نیو، زیرومیٹر خریدی اور شام کو جب وہ اپنے دوست کو دکھانے (نیوکراچی) گئے تو گاڑی اُن کی نہ رہی اور یوں اُن کو تقریباً ایک لاکھ کا صدمہ برداشت کرنا پڑا۔

میں جب بھی اس طرح کا کوئی واقعہ سنتا یا پڑھتا ہوں یا مجھے کوئی بتاتا ہے تو میری زبان پر ایک ہی بات ہوتی ہے کہ یہ تو ہونا ہی ہے بلکہ یہ چیز تو ابھی اور بڑھے گی اس طرح یہ چیز کبھی ختم نہیں ہوسکتی۔ اس کی بنیادی وجہ روزگار ہے کیوں کہ جب ایک آدمی کے پاس روزگار نہیں ہے اور اُس کے پاس کھانے کے لیے بھی کچھ نہیں تو اب وہ کیا کرے گا، صرف دو صورتیں ہوں گی ایک یہ کہ اگر وہ کمزور ہوگا تو بھیک مانگے گا اور اگر تھوڑا طاقت ور ہوگا تو پھر اسی طرح چوری وغیرہ کرے گا۔ یہاں ایک بات اور بغور رکھنی چاہیے کہ اسلام میں چوری کی سزا جو ہاتھ کاٹنا مقرر کی گئی ہے وہ بھی کھانے کے علاوہ دوسری چیزوں میں ہے، اگر کھانے کے لیے کچھ نہیں ہے اور پھر چوری کی ہے تو اُس پر ہاتھ نہیں کاٹا جائے گا۔

لہٰذا زیادہ تعداد میں چوری کی وجہ ہی یہ ہےاور اس کو روکنے کے لیے حالات کو بہتر کرنا ہوگا، بصورت دیگر یہ چیز ختم تو ناممکن بلکہ اور بڑھے گی۔ اور ہمار ے یہاں کے طریقہ کار کے مطابق کہ حکمرانوں نے واردات کے بعد نوٹس لے لیا اور ایک دو کو پکڑ کے سزا دلوادی اس طرح سے کبھی بھی اور کسی صورت بھی مسئلہ حل نہیں ہوسکتا ہے۔

’’Q‘‘ موبائل قادیانیوں کی پڑوڈکٹ ہے؟

2012-01-07T10:21:00.000-08:00

پچھلے کافی دنوں سے موبائل پر میسجز اور انٹرنیٹ پر مختلف ویب سائٹس خصوصاً فیس بک پر یہ چرچا خوب پھیلایا جا رہا ہے کہ ’’Q‘‘موبائل قادیانیوں کی پروڈکٹ ہے اس میں محمد صلی اللہ علیہ وسلم کا نام لکھو تو نہیں لکھا جاتا اور چوں کہ یہ’’Q‘‘ ہے اور ’’Q‘‘ سے ہی قادیانی بھی آتا ہے لہٰذا یہ موبائل استعمال نہیں کیا جائے۔ فیس بک پر ایک پروفائل پر میں نے دیکھا کہ کسی نے ایک تصویر لگائی تھی جس میں اس کے بارے میں لکھا تھا کہ استعمال نہ کیا جائےاور اس خبر کو زیادہ سے زیادہ لوگوں میں شیئر کرنے کا کہا گیا تھا تو تقریباً ڈھائی سو کے قریب لوگ اس کو شیئر کر چکے تھے۔

میں کافی دنوں سے اس کی تحقیق میں تھا کہ کیا یہ بے بنیاد باتیں کیو موبائل کو بدنام کرنے کے لیے تو نہیں پھیلائی جا رہیں اس لیے کہ کوئی حتمی بیان ابھی تک آیا نہیں اگر ایسا ہوتا تو ضرور کوئی نہ کوئی بیان آتا لہٰذا ’’روزنامہ جنگ 25 دسمبر2011 بروز اتوار‘‘ کو ’’Q‘‘ موبائل کی طرف سے یہ وضاحت شائع ہوئی۔

کیا ہر کام کے لیے میڈیا رہ گیا ہے!!!

2012-01-05T05:54:00.000-08:00

پچھلے چند دنوں سے میڈیا پر رات کے خبرنامہ میں ایک خاص چیز دیکھنے کو مل رہی ہے وہ یہ کہ خبرنامہ کے دوران ایک رپورٹ دکھائی جاتی ہے جو کہ کسی مجبور ترین انسان کے گھر کی کہانی یا اُس کی بیماری یا پھر مشکلات پر ہوتی ہے، رپورٹ دکھانے کے بعد ایک بریک لیا جاتا ہے اور پھر فوراً ہی ’’بریکنگ نیوز‘‘ دی جاتی ہے جس میں دکھایا جاتا ہے کہ ہمارے چینل پر خبر نشر ہونے کے بعد فلاں وزیر نے اس پر نوٹس لے لیا اور اخراجات اُٹھانے کی مکمل ذمہ داری لے لی، یا گھر والے کو ملازمت دینے کا اعلان کردیا۔۔۔ وغیرہ وغیرہ

اچھی بات ہے کہ نوٹس لے لیا اور اب اُن کی مدد کی جائے گی لیکن!!!
۱۔ کیا ہر کام کے لیے میڈیا رہ گیا ہے۔
۲۔ کیا ہر مفلس و مجبور بندہ میڈیا کو بلا کر اپنی رپورٹ بنواسکتا ہے۔
۳۔ جو شخص میڈیا پر نہیں آنا چاہتا تو کیا اُن کی بھی مدد ہوگی۔
۴۔ کیا وزیر بغیر میڈیا پر آئی ہوئی بات پر نوٹس لیں گے۔

میری نظر میں ہزاروں بندوں میں سے کسی ایک کو میڈیا پر لاکر دکھاکر اُس پر نوٹس لینا کوئی بڑی بات نہیں۔ ہونا تو یہ چاہیےکہ اس کام کے لیے گورنمنٹ کو ایک ٹیم تشکیل دینی چاہیے یا ادارہ بنانا چاہیے تاکہ اس طرح کے افراد وہاں آکر اپنے مسائل بآسانی بتا سکیں اور پھر اُن کی غیر اعلانیہ مدد کی جائے تاکہ گھر والوں کو بھی شرمندگی کا سامنا نہ کرنا پڑے، کیونکہ اُن کو اس چیز کی خوشی تو ضرور ہوتی ہوگی کہ ہماری مدد کا اعلان ہوگیا لیکن کیا اس چیز کا افسوس نہیں ہوتا ہوگا کہ دنیا جہان کے سامنے ہمیں کس حالت میں دکھایا گیا۔

جب اپنی ذمہ داری ادا نہیں ہو رہی تو دوسروں پر تنقید بند کرو

2011-03-23T09:06:00.000-07:00

گزشتہ دنوں ایک نیوز چینل پر پروگرام دیکھا جس میں ڈاکٹر فوزیہ وہاب اور سابق سٹی ناظم سید مصطفیٰ کمال صاحب تشریف لائے تھے اور پروگرام میں کچھ نوجوان طلباء بھی موجود تھے کہ جنہوں نے ان دونوں حضرات سے سوالات کرنے تھے۔۔۔

پروگرام کے دوران معلوم ہوا کہ فوزیہ وہاب صاحبہ مصطفیٰ کمال صاحب سے کچھ ناراض ہیں اور مصطفیٰ کمال نے جتنا کام کیا یا جو بھی کیا اُس سے اُن کو کوئی غرض نہیں، جو نہیں ہوا اُن کو وہ چاہیے۔۔۔ بہرحال جب پروگرام کچھ آگے کی جانب بڑھاتو ایسا لگا کہ اُن کی ناراضگی کی وجہ صرف اور صرف یہ ہے کہ اُنہوں نے کراچی میں جتنے پل بنائے یا جتنا کراچی کو سجایا یا جتنی عوام کے لیے خدمت کی یا جو کام کیا وہ بالکل معمولی کام ہے اُس کام کی کوئی اہمیت نہیں ہے اور جو کام کرنے چاہیے تھے وہ رہ گئے۔۔۔ پروگرام کے دوران اُنہوں نے بھی مصطفیٰ کمال صاحب سے کچھ سوالات کیے جس کے مصطفیٰ کمال صاحب نے تحمل کے ساتھ جواب دیے لیکن چوں کہ فوزیہ وہاب صاحبہ کا ہر اعتراض مصطفیٰ کمال صاحب رد کرتے جا رہے تھے اس وجہ سے اُن کو بہت غصہ آ رہا تھا کہ کوئی ایسا سوال ہی نہیں تھا جس پر وہ خاموش ہوجائیں یا اُس کا جواب صحیح نہ بن پائے۔۔۔ کیوں!!! اس وجہ سے کہ اُس شخص نے کراچی میں ایمانداری کے ساتھ کام کیا اور ہر ایک کام کو بخوبی انجام دے کر اپنا حق اور فرض نبھایا تو جو حق پر ہو اور جس کے پاس پوری معلومات ہو وہ کبھی چُپ نہیں رہ سکتا، اُس بندے نے نہایت اطمینان کے ساتھ تمام سوالوں کے جواب دیے۔۔۔ جوابات کے درمیان ہال میں بیٹھے ہوئے تمام لوگوں نے مصطفیٰ کمال کی حمایت میں آوازیں لگانا شروع کیں اور پھر فوزیہ وہاب صاحبہ نے دو ایسے سوال کیے کہ جوبالکل معمولی سوالات تھے لیکن چونکہ وہ کام ابھی نہیں ہوئے تھے اس وجہ سے وہ سوالات اُن کو مجبوراً کرنے پڑے تو اُس پر مصطفیٰ کمال نے کہا کہ شاید آپ کو معلوم نہیں ہے کہ کراچی میں کتنی ایجنسیاں کام کر رہی ہیں اور پھر اُس کا جواب دیا۔۔۔ پھر کہا اور رہی بات آپ کے دوسرے سوال کی تو پتا نہیں آپ کو پتا ہے یا نہیں کہ میں یہ کام پہلے ہی کر کے اخبار میں چھپوا چکا ہوں تو اس پر فوزیہ وہاب صاحبہ غصہ میں آگئیں اور اُن کو آخر کار یہ کہنا پڑ گیا کہ ’’آپ اس طریقے سے بات نہیں کریں کہ آپ کو شاید پتا ہے کہ نہیں پتا ہے، اس طریقے سے لگ رہا ہے کہ صرف اور صرف آپ ایک عقل والے ہیں اور باقی بے عقل ہیں‘‘۔
پروگرام دیکھ کر ایک جملہ ذہن میں آیا کہ
جب کوئی خود اپنی ذمہ داری ادا نہیں کرسکتا تو کم از کم دوسروں پر تنقید تو نہیں کرنی چاہیے۔۔۔

بے عیب تصویر

2011-01-08T12:20:00.000-08:00

کہنے کو تو بادشاہ انصاف پسند اور عوام کے دکھ سکھ کو سمجھنے والا تھا مگر جسمانی طور پر ایک ٹانگ سے لنگڑا اور ایک آنکھ سے کانا تھا۔
ایک دن بادشاہ نے اپنی مملکت کے ماہر مصوروں کو اپنی تصویر بنوانے کیلئے بلوا لیا اور وہ بھی اس شرط پر کہ تصویر میں اُس کے یہ عیوب دکھائی نہ دیں۔ سارے کے سارے مصوروں نے یہ تصویر بنانے سے انکار کر دیا اور وہ بھلا بادشاہ کی دو آنکھوں والی تصویر بناتے بھی کیسے جب بادشاہ تھا ہی ایک آنکھ سے کانا اور وہ کیسے اُسے دو ٹانگوں پر کھڑا ہوا دکھاتے جبکہ وہ ایک ٹانگ سے لنگڑا بھی تھا۔ لیکن اس اجتماعی انکار میں ایک مصور نے کہا: بادشاہ سلامت میں بناؤں گا آپ کی تصویر اور جب تصویر تیار ہوئی تو اپنی خوبصورتی میں ایک مثال اور شاہکار تھی۔
وہ کیسے؟؟
تصویر میں بادشاہ شکاری بندوق تھامے نشانہ باندھے ، جس کیلئے لا محالہ اُس کی ایک (کانی) آنکھ کو بند ، اور اُسکے (لنگڑی ٹانگ والے) ایک گھٹنے کو زمین پر ٹیک لگائے دکھایا گیا تھا۔ اور اس طرح بڑی آسانی سے ہی بادشاہ کی بے عیب تصویر تیار ہو گئی تھی۔
کیوں ناں ہم بھی اِسی طرح دوسروں کی بے عیب تصویر بنا لیا کریں خواہ ان کے عیب کتنے ہی واضح نظر آ رہے ہوں!!! اور کیوں ناں جب ہم لوگوں کی تصویر دوسروں کے سامنے پیش کیا کریں تو اُن کے عیبوں کی پردہ پوشی کر لیا کریں!!! آخر کوئی شخص بھی تو عیبوں سے خالی نہیں ہوتا!!! کیوں نہ ہم اپنی اور دوسروں کی مثبت اطراف کو اُجاگر کریں اور منفی اطراف کو چھوڑ دیں...... اپنی اور دوسروں کی خوشیوں کیلئے!!!
ابنِ عمر رضی اللہ عنہ کی روایت کردہ ایک حدیث پاک کا ملخص اور مفہوم ہے کہ
(جو شخص مسلمان کی پردہ پوشی کرے گا ، اللہ تعالیٰ قیامت کے دن اس کی پردہ پوشی کرے گا)

گیلانی ماموں اور منا بھائی ایم۔بی۔بی۔ایس

2010-08-06T05:38:00.000-07:00

تمہیں بھی تو انہیں باٹوں سے تول کر ملے گا

2010-05-10T00:47:00.000-07:00

كسان كى بيوى نے جو مکھن كسان كو تيار كر كے ديا تها وه اسے ليكر فروخت كرنے كيلئے اپنے گاؤں سے شہر كى طرف روانہ ہو گيا، يہ مکھن گول پيڑوں كى شكل ميں بنا ہوا تها اور ہر پيڑے كا وزن ايک كلوگرام تها.

شہر ميں كسان نے اس مکھن كو حسب معمول ايک دوكاندار كے ہاتھ فروخت كيا اور دوكاندار سے چائے كى پتى، چينى، تيل اور صابن وغيره خريد كر واپس اپنے گاؤں كى طرف روانہ ہو گيا.

كسان كے جانے بعد...... دوكاندار نے مكهن كو فريزر ميں ركهنا شروع كيا.... اسے خيال گزرا كيوں نہ ايک پيڑے كا وزن كيا جائے.

وزن كرنے پر پيڑا 900 گرام كا نكلا، حيرت و صدمے سے دوكاندار نے سارے پيڑے ايک ايک كر كے تول ڈالے مگر كسان كے لائے ہوئے سب پيڑوں كا وزن ايک جيسا اور 900 - 900 گرام ہى تها.

اگلے ہفتے كسان حسب سابق مکھن لے كر جيسے ہى دوكان كے تهڑے پر چڑها، دوكاندار نے كسان كو چلاتے ہوئے كہا کہ وه دفع ہو جائے، كسى بے ايمان اور دهوكے باز شخص سے كاروبار كرنا اسكا دستور نہيں ہے. 900 گرام مکھن كو پورا كلو گرام كہہ كر بيچنے والے شخص كى وه شكل ديكهنا بهى گوارا نہيں كرتا.

كسان نے ياسيت اور افسردگى سے دوكاندار سے كہا: "ميرے بهائى مجھ سے بد ظن نہ ہو".

ہم تو غريب اور بے چارے لوگ ہيں، ہمارے پاس تولنے كيلئے باٹ خريدنے كى استطاعت كہاں؟

آپ سے جو ايک كلو گرام چينى ليكر جاتا ہوں اسے ترازو كے ايک پلڑے ميں ركھ كر دوسرے پلڑے ميں اتنے وزن كا مکھن تول كر لے آتا ہوں.

اگرچہ بت ہیں جماعت کی آستینوں میں

2010-04-21T00:41:00.000-07:00

ایک شخص کا جوتا چرانے کا انوکھا واقعہ

2010-03-08T02:46:00.000-08:00

ایک شخص نے نمازیوں کے جوتے چرانے کا ایک عجیب طریقہ نکالا، وہ یہ کہ تیتر کا پنجرہ لے کر مسجد میں چلے جاتے تھے۔ اس پنجرہ پر پردہ پڑا رہتا تھا جہاں کوئی اچھا سا جوتا دیکھا وہیں پنجرہ رکھ دیا اور نماز میں شریک ہوگئے جب سجدہ میں پہنچے تو جوتہ چپکے سے پنجرہ میں رکھ دیا، سر سجدہ میں اور جوتہ پنجرہ میں بہت دن تک گاڑی چلتی رہی جب کثرت سے جوتے چوری ہونے لگے تو لوگوں کو تفتیش حال کا فکر ہوا۔ آخر کسی نے تاڑ ہی لیا، اُٹھایا جو کپڑا اوپر سے پنجرہ کا تو چرائے ہوئے جوتے ظاہر ہوگئے اب تک جناب عالی نمازیوں کے بھیس میں چور بنے ہوئے تھے۔ چوری پکڑی گئی تو پڑا پڑجوتے پڑنے لگے۔

نظم

2010-02-11T22:41:00.001-08:00

اے خدا جب بھی تیرا آسمان دیکھتا ہوں
اُس میں بسا اِک جہان دیکھتا ہوں

نہ جانے کتنے ہی جہانوں کی سیر کرتا ہوں
کھول کر جب تیرا قرآن دیکھتا ہوں

تیرے احسان کتنے ہیں بندوں پہ
جب بھی سورہٴ رحمٰن دیکھتا ہوں

تُو تو کہتا ہے رگِ جان سے بھی ہوں میں قریب۔۔۔!
پھر پریشان کیوں آج کا انسان دیکھتا ہوں

اُس کی رحمت سے کبھی مایوس نہ ہونا اے دوست!
تجھ میں اُس کی رحمت کے نشان دیکھتا ہوں

دل اور آنکھ کی درد کی باتیں

2010-02-04T00:26:00.000-08:00

دل نے آنکھ سے کہا:
دیکھا کرو کم، کیونکہ دیکھتے ہو تم اور تڑپتے ہیں ہم

آنکھ نے دل سے کہا:
اُن کو یاد کرو کم، کیونکہ یاد کرتے ہو تم روتے ہیں ہم

بڑی لکیر

2010-01-25T00:16:00.000-08:00

کلاس روم میں سناٹا طاری تھا۔ طلبا کی نظریں کبھی استاد کی طرف اُٹھتیں اور کبھی بلیک بوڑد کی طرف۔ استاد کے سوال کا جواب کسی کے پاس نہیں تھا۔ سوال تھا ہی ایسا۔ استاد نے کمرے میں داخل ہوتے ہیں بغیر ایک لفظ کہے بلیک بورڈ پر ایک لمبی لکیر کھینچ دی۔ پھر اپنا رخ طلبا کی طرف کرتے ہوئے پوچھا، ’’تم میں سے کون ہے جو اس لکیر کو چھوئے بغیر اسے چھوٹا کردے؟‘‘
’’یہ ناممکن ہے۔‘‘، کلاس کے سب سے ذہین طالبِ علم نے آخر کار اس خاموشی کو توڑتے ہوئے جواب دیا۔ ’’لکیر کو چھوٹا کرنے کے لیے اسے مٹانا پڑے گا اور آپ اس لکیر کو چھونے سے بھی منع کر رہے ہیں۔‘‘ باقی طلبا نے بھی گردن ہلاکر اس کی تائید کردی۔ استاد نے گہری نظروں سے طلبا کو دیکھا اور کچھ کہے بغیر بلیک بورڈ پر پچھلی لکیر کے متوازی مگر اس سے بڑی ایک اور لکیر کھینچ دی۔ جس کے بعد سب نے دیکھ لیا کہ استاد نے پچھلی لکیر کو چھوئے بغیر اسے چھوٹا کردیا تھا۔ طلبا نے آج اپنی زندگی کا سب سے بڑا سبق سیکھا تھا۔ دوسروں کو نقصان پہنچائے بغیر، ان کو بدنام کیے بغیر، ان سے حسد کیے بغیر، ان سے الجھے بغیر ان سے آگے نکل جانے کا ہنر چند منٹ میں انہوں نے سیکھ لیا تھا۔

انسان کو اللہ تعالیٰ نے جس فطرت پر پیدا کیا ہے اس میں اپنا موازنہ دوسروں سے کرکے ان سے آگے بڑھنا انسان کی طبیعت میں شامل ہے۔ اس کام کو کرنے کا ایک طریقہ یہ ہے کہ دوسرے کو چھوٹا بنانے کی کوشش کی جائے۔ مگر ایسی صورت میں انسان خود بڑا نہیں ہوتا۔ دوسرا طریقہ یہ ہے کہ دوسروں سے الجھے بغیر خود کو مضبوط، طاقتور اور بڑا بنانے پر توجہ دی جائے۔ دوسرے اس شکل میں بھی چھوٹے ہوجاتے ہیں، مگر اصل بات یہ ہے کہ اس عمل میں انسان خود بڑا ہوجاتا ہے۔

دوسرے سے الجھے بغیر آگے بڑھنا، اس دنیا میں ترقی کا اصل طریقہ ہے۔ فرد اور قوم دونوں کے لیے دیرپا اور مستقل ترقی کا یہی واحد راستہ ہے۔

بھوک کا سردار

2010-01-20T22:06:00.000-08:00

دنیوی زندگی میں انسان کھانے کے بغیر زندہ نہیں رہ سکتا، اِسی لیے ہر انسان کو خوراک کی ضرورت پیش آتی ہے، مگر کچھ کی خوراک عام انسانوں بلکہ خاص انسانوں سے بھی زیادہ ہوتی ہے، جو کہ گمان سے باہر ہوتی ہے، کچھ ایسی ہی مثال اس ویڈیو میں نظر آتی ہے کہ کھانے کے باوجود اُس شخص کا پیٹ نہیں بھرتا اور وہ سال میں صرف ایک مرتبہ عید الاضحی کے موقع پر کھانا پیٹ بھر کر کھاتا ہے، ایک نجی نقریب میں اس نے ۱۰۰ کلو گرام گوشت جمع کرنے کے بعد اُس کو اُبال کر لیمو ڈال کر تین گھنٹے تک مسلسل کھانے کے ساتھ اُس نے ۲۴ کلو گرام گوشت پر مشتمل دو دیگیں ۳۰ کولڈرنک اور ۳ کلو دہی کھاتے ہوئے سیگریٹ بھی استعمال کی۔

سال کا سب سے بڑا ایکٹر

2010-01-15T02:28:00.000-08:00

یوم عاشور پر ایک نوجوان کی ہلاکت

2010-01-02T05:52:00.000-08:00

یوم عاشورہ کے موقع پر ہونے والے سانحہ میں ایک نوجوان ہلاک، جس کی عمر 26 سال تھی اور شادی کو 6 ماہ ہوئے تھے

اپنی موٹر سائیکل کی حفاظت کے لیے اُس کو حفاظت کی جگہ پر کھڑے کرنے کے لیے باہر نکلا تو شر پسندوں نے فائرنگ کا نشاتہ بناتے ہوئے ہلاک کردیا۔

رسول اللہ ﷺ کی قمیص مبارک

2009-12-21T21:52:00.002-08:00

حضورِ اکرم صلی اللہ تعالیٰ علیہ وسلم کی قمیص مبارک

صَلَّی اللّٰہُ عَلَی النَّبِیِّ الْاُمِیِّ وَاٰلِہ صَلَّی اللّٰہُ عَلَیْہِ وَسَلَّمْ

گھوڑے کی مزیدار لاتھ

2009-12-21T21:52:00.001-08:00

غزل

2009-12-21T21:51:00.000-08:00

گیت: بہت دِنوں کی بات ہے
آواز: جگجیت سنگھ
شاعر: سلام مچھلی شہری

بہت دِنوں کی بات ہے
فضا کو یاد بھی نہیں
یہ بات آج کی نہیں
بہت دِنوں کی بات ہے

شباب پر بہار تھی (۲)
فضا بھی خوش گوار تھی
نہ جانے کیوں مچل پڑا
میں اپنے گھر سے چل پڑا

کسی نے مجھ کو روک کر
بڑی ادا سے ٹوک کر
کہا تھا: ’’لوٹ آئیے!
مِری قسم نہ جائیے (نہ جائیے)!‘‘

پر مجھے خبر نہ تھی
ماحول پر نظر نہ تھی
نہ جانے کیوں مچل پڑا
میں اپنے گھر سے چل پڑا (میں چل پڑا)

میں شہر سے پھر آگیا
خیال تھا کہ پاگیا
اُسے جو مجھ سے دور تھی
مگر مِری ضرور تھی

اور اِک حسین شام کو
میں چل پڑا سلام کو
گلی کا رنگ دیکھ کر
نئی ترنگ دیکھ کر
مجھے بڑی خوشی ہوئی (خوشی ہوئی)

میں کچھ اِسی خوشی میں تھا
کسی نے جھانک کر کہا:
’’پرائے گھر سے جائیے!
مِری قسم نہ آئیے (نہ آئیے)!‘‘

وہی حسین شام ہے (۲)
بہار جس کا نام ہے
چلا ہوں گھر کو چھوڑ کر
نہ جانے جاؤں گا کِدھر

کوئی نہیں جو ٹوک کر
کوئی نہیں جو روک کر
کہے کہ ’’لوٹ آئیے!
مِری قسم نہ جائیے!‘‘ (۵)

جوانی کا قصہ

2009-12-16T02:10:00.002-08:00

یہی زندگی قہقہے شادمانی
ہمیشہ حسینوں سے آنکھیں لڑانی
سدا کامیابی، سدا کامرانی
بہت یاد آتی ہیں باتیں پُرانی

اب ہماری جوانی کا قصہ ۱۱ ستمبر سے بڑی آفت ہے یا نہیں اس کا فیصلہ تو جارج بش ہی کریں گے۔ مگر مجھے اِتنا یاد ہے کہ ایامِ طفلی سے ہی فدوی 20 سال سے زائد عمر کی خواتین کی گود میں جانے سے انکاری رہا۔ کالج سے یہ کہہ کر واپس بھیج دیا گیا کہ آپ کے بیٹے کو لڑکیوں کے ساتھ بیٹھنے کی عادت ہے۔ والدہ نے زیادہ سرزنش نہیں کی۔ شاید اُنہیں یہی شکایت والدِ محترم سے بھی تھی۔ مگر ابا جان بوجۂ پیشۂ سپہ گری مجھے یہ جمہوری آزادی دینے کے قائل نہیں تھے۔ اُن کی اِسی نائق کے باعث فدوی کوایجوکیشن کی نعمت سے ہمیشہ محروم رہا۔ خیر میٹرک کرنے کے بعد نیوی سے منسلک ہوئے اور اُس کے بعد ہمت کا علم، موجوں پہ قدم، نیول اکیڈمی کے آس پاس صنفِ نازک کا وجود اتنا ہی ناپید تھا جتنا ریما کے رقص سے اعضا کی شاعری۔ اور ہر کھانے کی میز پر اس صنف کےجسمانی خوائص پر اس تفصیل سے روشنی ڈالی جاتی کہ اُنہیں یقین ہوگیا کہ اگر میں کچھ روز اور اس صحبت میں رہا تو جنت کے دروازے ہمیشہ کے لیے میرے پہ بند کر دیے جائیں گے۔ خیر ٹریننگ سے فارغ ہوئے۔۔۔ جان چھٹی۔ اور پھر۔۔۔۔۔۔۔۔

وہ دن رات کوئے نگارا کے پھیرے
وہ کمرے فروزاں ، وہ زینے اندھیرے
وہ زلفوں کے حلقے، وہ بانہوں کے گھیرے
وہیں کو چٹو جا کے راتیں بِتانی
بہت یاد آتی ہیں باتیں پُرانی

وہ سردی کی راتیں، وہ جاڑے کا جوبن
لحافوں میں کم سِن دلوں کی وہ دھڑکن
چھڑانا اُن ہاتھوں سے اپنا وہ دامن
وہ آنگن میں مہکی ہوئی رات دانی
بہت یاد آتی ہیں باتیں پرانی

اور پھر طرفۂ تماشا یہ کہ ہمیں احباب بھی وہ میسر آئے کہ جو اوباشی اور اخلاق باختگی میں ایک نئے مکتبۂ فکر کے بانی ہیں۔ ایک صاحب یوسف کہ نام کا اثر شکل و صورت پر بالکل نہیں ، شکل اس سے یکسر پا ، نرسوں سے خاص رغبت رکھتے ہیں۔ ایک دن فرمانے لگے کہ میں نے ایک نرس سے پوچھا کہ نوکری کیسی چل رہی ہے؟ تو کہنے لگی سر نوکری کا کیا ہے سارا دن یس سر یس سر کرتے گزر جاتا ہے اور ساری رات نو سر نو سر کرتے کرتے۔
مکیں اُدھر کے بھی جلوے اِدھر کے دیکھتے ہیں
بہت بار ریہرسل کی۔

خیر وہ زمانہ تو یوں گزرا کہ رات کو یہ عالم ہوتا تھا کہ
دی مؤذن نے شبِ وصل اذاں پچھلے پہر
ہائے کم بخت کو کس وقت خدا یاد آیا

اور دن کو یہ روٹین تھی کہ جہاں لڑکی دیکھی پیچھے پیچھے چل پڑے، خوبصورتی کوئی شرط نہیں، لمبا چوڑا تعلق رکھنا نہیں،
شاعرِ مشرق نے خود فرمایا کہ

جو کبوتر پر جھپٹنے میں مزہ ہے اے پسر
وہ مزہ شاید کبوتر کے لہو میں بھی نہیں

خیر ہمارا قصۂ جوانی ملکی وسائل پر ہی محدود رہتا اگر حکومتِ وقت ہمیں باہر نہیں بھیجتی تو وہاں جاکر ہم نے دیکھا کہ

ہم کو تو میسر نہیں مٹی کا دیا بھی
گھر پیر کا بجلی کے چراغوں سے ہے روشن

جہاں جاؤ یوں محسوس ہوتا تھا کہ بے واچ کے شوٹنگ چل رہی ہے تب پھر احساس ہوا کہ اگر انگریز نے ہم پہ سو سال حکومت کی ہے تو اس کی غیر سیاسی وجوہات میر جعفر اور میر صادق کے علاوہ

کچھ اور بھی تھیں کہ عرضِ کلیسہ کا ہر ماہ پارہ
سنا ہے اُس کے بدن کی تراش ایسی ہے
کہ پھول اپنی قبائیں کتر کے دیکھتے ہیں
سنا ہے چشمِ تصور سے دشتِ امکاں میں
پلنگ زاویے اُس کی کمر کے دیکھتے ہیں

تو ہماری اس کثرت اختلاط سے جیلس اور حسرتِ اختلاط میں مبتلا چند سینئرز نے کہا کہ ٹھیک ہے عیاشی کرلو مگر یاد رکھو کہ ایڈز بہرحال لاعلاج مرض ہے مگر میں نے اس چیز کا کوئی غم نہیں لگایا، کوئی حفاظتی تدابیر نہیں کی کیونکہ
مومن ہے تو بے تیغ بھی لڑتا ہے سپاہی
اُس کے بعد کچھ شب و روز یوں گزرے کہ

سجی خلوتوں میں کبھی شغلِ مینہ
وہ محبوبۂ خوش ادا خوش کرینہ
کبھی اُس کے ہاتھوں سے ضد کرکے پینا
کبھی اپنے ہاتھوں سے اُس کو پلانی
بہت یاد آتی ہیں باتیں پُرانی

خیر یورپ سے واپسی پر مایوسی تو بہت ہوئی، مگر جلد ہی دور بھی ہوگئی کیونکہ ماشاء اللہ ہمارا ملک بھی کسی سے پیچھے نہیں ہے۔
ذرا نم ہو تو یہ مٹی بڑی زرخیز ہے ساقی
اور ڈش اور کیبل نے وہ نمی تو فراہم کر ہی دی ہے اسی لیے اب صائمہ اور پمیرا انگریسن کی جسمانی مماثلت کے موازنے کے لیے آپ کو چشمِ بینا کی ضرورت نہیں ہے خیر میں اس قصہ کو طول دوں تو شبِ فراق اور سمیٹ لوں تو دلِ عاشق لیکن وہ گئے زمانوں کی باتیں ہیں اب تو بس اتنا ہی کہنا ہے کہ اب

نہ وہ دل نہ وہ دل کی نادانیاں ہیں
نہ وہ ہم نہ وہ بزم سامانیاں ہیں
نہ وہ دوستوں کی گل افشانیاں ہیں
نہ وہ فکرِ رنگیں کی جولانیاں ہیں
گئی شعر گوئی رہی نوحہ خوانی
وہ بیتی جوانی وہ بیتی جوانی

ایک خاموش پیغام تمام انسانوں کے لیے

2009-12-16T02:10:00.001-08:00

ایک خاموش پیغام تمام انسانوں کے لیے۔۔۔۔

ایک دن ایک عالم بازار میں بیٹھا ہوا تھا، اتنے میں ایک بادشاہ کا گزر ہوا

بادشاہ نے عالم سے پوچھا: "حضرت کیا کر رہے ہیں؟"،

عالم نے کہا: "بندوں کی اللہ سے صلح کروا رہا ہوں، اللہ تو مان رہا ہے پر بندے نہیں مانتے"۔

کچھ دنوں بعد بادشاہ کا گزر قبرستان کے پاس سے ہوا تو دیکھا کہ وہی عالم قبرستان میں بیٹھا ہوا ہے،

بادشاہ نے عالم سے پوچھا"حضرت کیا کر رہے ہیں؟"،

عالم نے کہا: "بندوں کی اللہ سے صلح کروا رہا ھوں، آج بندے تو مان رہے ہیں پر اللہ نہیں مان رہا ہے"۔

ایک بوڑھے باپ کے آخری دن

2009-12-16T02:09:00.000-08:00

بڑے افسوس کی بات ہے کہ اولاد اپنے ماں باپ کو بھول جاتی ہے

کل ایک جگہ جانا ہوا تو وہاں ایک بات سُنی تو دل بجھ گیا

ایک بہت بوڑھا باپ بیمار، فالج کا مریض، کہیں جانے کے لائق نہیں، بستر سے اُٹھنے کے لائق نہیں اپنی زندگی کی سانسوں کو پورا کر رہا ہے۔ اور اُس کے تین بیٹے جو کہ مکان کے اُوپر دوسرا اُس سے اُوپر اور تیسرا اُس سے اوپر رہتے ہیں کسی کی توجہ اپنے باپ کی طرف نہیں اور باپ کو نیچے کوئی دیکھنے نہیں آتا کہ کوئی کام کرنا نہ پڑجائے، جس باپ نے اُن کو بڑا کیا اُسی کو اولاد دغا دے جائے تو باپ کے دل پر کیا گزرے گی وہ بوڑھا باپ اکیلا بستر پر پڑا رہتا ہے باتھ روم جانے کے قابل نہیں اور بیٹوں کو اپنی پرواہ کہ مکان کی فائل لے کر کھڑے ہیں کہ جیسے ہی ابا کا دم نکلے اور ہم اس گھر کے حصہ تقسیم کریں۔

کچھ دن پہلے ابا نے تینوں بچوں کو نیچے بلایا اور کہنے لگے کہ تم نافرمان اولاد نے مجھے کچھ نہ دیا میں تم میں سے کسی سے خوش نہیں ہوں۔ تم میرے آخری وقت میں بھی میری خدمت نہیں کرسکتے۔

میرے ذہن میں ایک آیت آئی کہ اللہ تعالیٰ قرآن مجید کی سورۂ تغابن میں فرماتا ہے:
‌يَاَيُّهَا الَّذِيْنَ اٰمَنُوْا اِنَّ مِنْ اَزْوَاجِكُمْ وَاَوْلَادِكُمْ عَدُوًّا لَّكُمْ فَاحْذَرُوْهُمْ‌ۚ وَاِنْ تَعْفُوْا وَتَصْفَحُوْا وَتَغْفِرُوْا فَاِنَّ اللّٰهَ غَفُوْرٌ رَّحِيْمٌ‏

ایمان والوں تمہاری بیویوں اور تمہاری اولاد میں سے بعض تمہارے دشمن ہیں لہذا ان سے ہوشیار رہو اور اگر انہیں معاف کردو اور ان سے درگزر کرو اور انہیں بخش دو تو اللہ بھی بہت بخشنے والا اور مہربان ہے

لیکن اولاد نے اپنے باپ کو اس قابل ہی کہاں چھوڑا کہ باپ اپنے بیٹوں کو معاف کرنے کا سوچے بھی۔
اللہ تبارک وتعالیٰ ہمیں اپنی پناہ میں رکھے۔ آمین

قربانی کے مسائل

2009-12-07T05:57:00.000-08:00

قربانی کے مسائل، از: پروفیسر مفتی منیب الرحمن

سُپاری کے اشتہار کی اصل کہانی اُویس قادری کی زبانی

2009-12-01T03:15:00.001-08:00

کھانسی کے سیرپ کا مزاحیہ ’’فنی اشتہار‘‘

2009-12-01T02:37:00.000-08:00

الحاج محمد اویس رضا قادری سپاری کے اشتہار میں

2009-12-01T02:29:00.000-08:00

نظم (باپ بیٹے کے درمیان)

2009-11-24T00:11:00.000-08:00

ایک بچے نے کیا یوں باپ سے اپنے خطاب
پھلجھڑی لڑکی کسے کہتے ہیں بتلائیں جناب

سٹپٹا کر باپ نے پہلے تو دیکھا اس کی سمت
پھر کہا رک رک کے کیا بکتا ہے اے خانہ خراب

عمر کی جن منزلوں پر تو ابھی پہنچا نہیں
دیکھنے کیسے لگا پہلے سے آخر ان کے خواب

خیر سن، کہتے ہیں اس لڑکی کو اکثر پھلجھڑی
پھلجھڑی کے کارخانے میں جسے ملتا ہے جاب

اب میں تجھ سے پوچھتا ہوں سچ بتا جانِ پدر
باپ سے اپنے نہ کر کہنے میں کوئی اجتناب

ذہن میں آیا کہاں سے تیرے آخر یہ سوال
پڑھتا ہے اسکول میں تو، صرف تو اپنا نصاب

مسکرا کر بولا بچہ میں ہوں پاپا ناسمجھ
بکتا رہتا ہوں نہ جانے کیا بہ حالِ اضطراب

آپ بھی لیکن بتادیں کرکے گستاخی معاف
ذہن میں آیا کہاں سے آپ کے ایسا جواب

ابابیل لکھم پوری کی کتاب ’’اڑان‘‘

اداس رات

2009-10-29T23:44:00.000-07:00

بدن تھکن سے چور ہے
پر نیند ہم سے دور ہے
اس کا خیال ساتھ ہے
بڑی اُداس رات ہے

ہوائے غم کا زور ہے
سمندروں کا شور ہے
جدائیوں کی بات ہے
بڑی اُداس رات ہے

ہر نظر شراب ہے
اس کے ملنے کا خواب ہے
یہ کون سے عذاب ہے
بڑی اُداس رات ہے

گئے دنوں کی یاد ہے
تھکا تھکا سا چاند ہے
دکھی دکھی سی بات ہے
بڑی اُداس رات ہے

خوش آمدید

2009-10-27T05:26:00.000-07:00

میں تمام لوگوں کو جو میرا بلاگ پہلی دفعہ دیکھ رہے ہیں اُن کو خوش آمدید کہتا ہوں۔